سەرەکی / هەواڵ / پەرلەمانی عێراق ئەندامانی لیژنەی لێكۆڵینەوە لە رووداوەكانی خورماتوو دیاریدەکات

پەرلەمانی عێراق ئەندامانی لیژنەی لێكۆڵینەوە لە رووداوەكانی خورماتوو دیاریدەکات

پەرلەمانتارێكی كورد لە پەرلەمانی عێراق رایگەیاند، لە كۆبوونەوەی ئەمڕۆی پەرلەماندا دەنگ لەسەر ناوی ئەندامانی لیژنەی لێكۆڵینەوە لە رووداوەكانی خورماتوو دەدرێت‌. ئەندامانی لیژنەكە 11 كەس دەبن ‌و بەشێكیان كوردن.

فەرهاد قادر، پەرلەمانتاری فراكسیۆنی یەكێتی لە پەرلەمانی عێراق رایگەیاند، لە دانیشتنی ئەمڕۆ شەممە 3-2-2018 پەرلەمانی عێراق دەنگ لەسەر دیاریكردنی ئەندامانی لیژنەی لێكۆڵینەوە لە رووداوەكانی خورماتوو دەدرێت .

ئەندامانی لیژنەكە 11 كەس دەبن ‌و بەشێكیان كوردن، نوێنەری عەرەب ‌و توركمان لە لیژنەكەدا دەبن. فەرهاد قادر دەڵێت، راپۆرتی ئەو لیژنەیە دەبێتە بڕیاری پەرلەمانی عێراق.

ئەو پەرلەمانتارە كوردە ئەوەشی خستەڕوو، لە‌و لیژنەیەی پێكدەهێنرێ‌، نوێنەری لیژنەكانی مافی مرۆڤ، راگەیاندن، كۆ‌چ وكۆچبەران، یاسا، ئاسایش ‌و بەرگریی پەرلەمانی عێراقی تێدا دەبێت.

فەرهاد قادر وەك پەرلەمانتارێكی کوردی سنووری گەرمیان ئەندامی لیژنەكە دەبێت.

شاخەوان عەبدوڵڵا، پەرلەمانتاری فراکسیۆنی پارتی لە پەرلەمانی عێراق رایگەیاند، پرسی خورماتوو خراوەتە کۆتا خاڵی بەرنامەی کاری ئەمڕۆی پەرلەمانەوە.

شاخەوان عەبدوڵڵا دەشڵێت “بە سەرۆکی پەرلەمانمان گوتووە تێبینیمان لەسەر بەشێک لە ناوە پێشنیازکراوەکان هەیە و نابێ ئەو پەرلەمانتارانە بە ئەندامی لیژنەکە دیاریبکرێن، چونکە پەرلەمانتاری تێدایە خەڵکی خورماتوور و تاوانبارە بە سووتاندن و تاڵانکردنی ماڵی کورد لەو قەزایە، وەڵامی ئەویش باش بوو. هەروەها پەرلەمانتاری کوردیش هەیە کە هیچ خزمەتی بە خورماتوو نەکردووە و دەیەوێ ببێتە ئەندامی لیژنەکە”.

لە دانیشتنی رۆژی دووشەممە 8-1-2018ی پەرلەمانی عێراق بە كۆی دەنگی ئەندامانی ئامادەبووی دانیشتنەكە، كە زیاتر لە 170 پەرلەمانتار بوون، بڕیاریدا لیژنەیەكی پەرلەمانی بۆ لێكۆڵینەوە لە رووداوەكانی خورماتوو پێكبهێنرێت‌.

قەزای خورماتوو سەر بە پارێزگای سەلاحەدینە ‌و نزیكەی 100 كلیۆمەتر لە سەنتەری پارێزگاكەوە دوورە. ژمارەی دانیشتووانەكەی بە شارۆچكە ‌و گوندەكانییەوە نزیكەی 220 هەزار كەس دەبێت. كورد لە 55%، عەرەب لە 15%‌و توركمانیش لە 30% شارۆچكەكە پێكدەهێنن.

لە 16 ی ئۆكتۆبەری 2017 بەهۆی هاتنی حەشدی شەعبی ‌و سوپای عێراقی بۆ خورماتوو، نزیكەی هەشت هەزار خێزانی كوردی خورماتوو ئاوارەبوون ‌و هێشتاش بەشێكیان نەگەڕاونەتەوە شوێنی خۆیان.

بەپێی راپۆرتێكی کە ئەنجامدراوە لەو قەزایەدا چەكدارانی حەشدی شەعبی زۆرترین پێشێلكارییان بەرامبەر كوردانی قەزاكە كردووە، دەیان ماڵی كوردیان دوای تاڵانكردن ‌و سووتاندن تەقاندوونەتەوە، ئەوە جگە لە دەستدرێژی سێكسی ‌و تاڵانكردنی بازاڕی گەڕەكە كوردییەكان.

سەرچاوە:تۆڕی میدیایی ڕووداو

دەربارە lana

ئەم بابەتەش ببینە

_DSC0589

سەرۆکی دەستەی ناوچە کوردستانیەکانی دەرەوەی هەرێم سەردانی فراکسیۆنی یەکگرتووی ئیسلامی لە پەرلەمانی کوردستان کرد

ئەمڕۆ سێشەممە ڕێککەوتی ١٦ ی کانونی دووەمی ٢٠١٨ بەڕێز (نصرالدین سندی) سەرۆکی دەستەی گشتی ناوچە …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *