سەرەکی / هەواڵ / سێ خوله‌ هه‌ڵبژاردن بۆ ئه‌نجومه‌نى پارێزگاى كه‌ركووك نه‌كراوه‌

سێ خوله‌ هه‌ڵبژاردن بۆ ئه‌نجومه‌نى پارێزگاى كه‌ركووك نه‌كراوه‌

کۆمسیۆنی هەڵبژاردنەکانی کەرکووک: ئامادەین بۆ هەڵبژاردن

ماوەی زیاتر لە 11 ساڵە هەڵبژاردن بۆ ئەنجومەنی پارێزگای کەرکووک نەکراوە و ئەنجومەنی نوێنەرانی عێڕاقیش بۆ ئەوەی هەڵبژاردنی ئەنجومەنی پارێزگای تێدا نەکریت ، بە بڕیارێک تایبەتمەندی داوە بەو پارێزگایە.

بەپێی زانیاریەکان ئێستا ئەندامانی ئەنجومەنی پارێزگای کەرکووک کە ساڵانێکە ئەندامی ئەو ئەنجومەنەن بۆ خۆیان داوا دەکەن هەڵبژاردن بۆ ئەنجومەنی پارێزگای کەرکووک بکرێت ، بۆ ئەوەی خەڵکانی دیکە بتوانن لەو ئەنخجومەنەدا جێگە بگرن و پڕۆسەی دیموکراتی لە ڕێڕەوی خۆی نەوەستێت.

دوای ئەوەی لە چەند ڕۆژی ڕابردوو دا ئەنجومەنی وەزیرانی عێڕاق بڕیاریدا لە 16 ی 9 ی 2017 دا هەڵبژاردن بۆ ئەنجومەنی پارێزگاکانی عێڕاق بکرێت بەبێ ئەوەی ئاماژە بۆ ئەوە بکات ئەو هەڵبژاردنە پارێزگای کەرکووکیش دەگرێتەوە ، لە کاتێکدا ئەمساڵ دەبێتە سێ خولی لەسەر یەک کە هەڵبژاردن بۆ ئەنجومەنی پارێزگای کەرکووک نەکراوە.

بەرپرسی ڕاگەیاندنی لقی کەرکووکی کۆمسیۆنی باڵای سەربەخۆی هەڵبژاردنەکانیش ئاماژە بۆ ئەوە دەکات ئەوان وەکو لقی کەرکووکی کۆمسیۆن ئەگەر داوایان لێ بکرێت دەتوانن کاربکەن بۆ ئەنجامدانی هەڵبژاردنی ئەنجومەنی پارێزگای کەرکووک ، نوێنەرێکی کەرکووکیش لە ئەنجومەنی نوێنەرانی عێڕاق ڕایدەگەیەنێت هەموو هەوڵێک دەدەن بۆ ئەنجامدانی هەڵبژاردن لە پارێزگاکە.

محەمەد عوسمان یەکێک لە نوێنەرانی کەرکووک لە پەرلەمانی عێڕاق ڕایگەیاند : وەکو نوێنەرانی کورد لە پەرلەمان هەموو هەوڵێک دەخەینە گەڕ بۆ ئەوەی هەڵبژاردنی ئەنجومەنی پارێزگاکانی عێڕاق کەرکووکیش بگرێتەوە لەبەرئەوەی ماوەی زیاتر لە 11 ساڵە بە بیانوی ئەوەی کەرکووک تایبەتمەندی خۆی هەیە ، هەڵبژاردنی تیادا نەکراوە.

ئەو پەرلەمانتارە گووتیشی : لە پڕۆژە یاسای هەڵبژاردنی ئەنجومەنی پارێزگاکان و لە مادەی 37 دا ، کە لە دوو بڕگە پێکهاتووە ئاماژە بۆ ئەوە دەکرێت لە کەرکووک دەتوانرێت بەشداری هەڵبژاردنەکان بکرێت و ئێمەش هەوڵی جیددی بۆ جێبەجێکردنی ئەو مادەیە دەدەین بۆ ئەوەی هەڵبژاردن لە کەرکووکیش ئەنجامبدرێت.

ئاشکراشی کرد بابەتی هەڵبژاردنی ئەنجومەنی پارێزگای کەرکووک بە سیاسی کراوە و پێویستە مەرامی نەیارانی کەرکووک هەڵبوەشێتەوە بۆ ئەوەی ئەو دژایەتیەی لە هەموو بوارەکاندا لە حکومەتی خۆجێیی و خەڵکی کەرکووک دەکرێت کۆتایی پێبهێنرێت و هەڵبژاردن و بابەتە دیموکراتیەکانیش پەکی نەکەوێت.

هاوکات عەبدولباست دەروێش بەرپرسی ڕاگەیاندنی لقی کەرکووکی کۆمسیۆنی باڵای سەربەخۆی هەلبژاردنەکان ڕایگەیاند : ئێمە ئامادەین بۆ ئەنجامدانی هەلبژاردنی ئەنجومەنی پارێزگای کەرکووک و هێشتا کاتێکی باشمان لەبەردەست دایە ئەگەر داوامان لێبکرێت ، بەڵام بەپێی مادەی 23 کە ئەنجومەنی نوێنەرانی عێڕاق دەنگی لەسەر داوە هەڵبژاردن بۆ ئەنجومەنی پارێزگای کەرکووک هەڵپەسێردراوە.

ڕوونیشیکردەوە کە لەڕووی تەکنیکیشەوە لە پڕۆسەی تۆماری بایۆمەتری قۆناغێکی باشیان بڕیوە ، گووتیشی : ئێمە تۆماری دەنگدەرانمان نوێ کردووەتەوە و زیاتر لە 500 سەد هەزار هاووڵاتی سەردانی ناوەندەکانی کۆمسیۆنی هەڵبژاردنەکانیان کردووە بۆ نوێکردنەوەی داتاکانیان.

لەبارەی ئەگەری ئەنجامدانی هەڵبژاردنی ئەنجومەنی پارێزگای کەرکووک ، دەنگدەرانی حەویجە و دەوروبەری کە هیشتا ناوچەکانیان لە چنگی داعشدا ماوەتەوە ، ئەوان چۆن دەتوانن دەنگ بدەن؟ گووتی : ئێمە لەماوەی ڕابردوودا لەناو شاری کەرکووک بنکەمان کردەوە بۆ ئەنجامدانی پڕۆسەی بایۆمەتری بۆ خەڵکی حەویجە و بەشێکی زۆریان دەهاتن و ئەو پڕۆسەیان ئەنجامدەدا ، بۆیە ئەگەر هەڵبژاردن ئەنجامبدریت ، ئەوا دەتوانین بۆ دەنگدەرانی حەویجە و دەوروبەری کە هیشتا ناوچەکانیان لەژیر دەستی داعش دایە لەناو شاری کەرکووک بنکەیان بۆ بکەینەوە و بەشداری هەلبژاردن بکەن.

سەرچاوە: ماڵپەڕی باسنیوز 

 

دەربارە lana

ئەم بابەتەش ببینە

51415459_400436310718173_2156534561431879680_n

پرسەنامە بۆ بنەماڵەی خوا لێخۆشبوو میر تەحسین بەگ

بە داخ و پەژارەیەکی زۆرەوە هەواڵی کۆچی دوایی (میر تەحسین سەعید عەلی بەگ) میری ئێزیدییانمان …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *